SEGUNDA REUNIÓN DA CIDADE DO SAL

Ola, rapaces e rapazas!!!

Hoxe xuntámonos para falar do libro de Fina Casalderrey que rematamos de ler: O xenio da Cidade do Sal. De novo estivo centrado na figura de Mozart, o compositor no que se centran as aventuras tan ben narradas por unha das escritoras máis lidas entre a xuventude galega. Gustounos moito, e recomendámolo sen dúbida. Ademais, este libro ten o engadido de vir cun CD de música moi interesante, no que un cuarteto da Filharmonía de Galicia gravou varios cuartetos para corda de Mozart uníndoos a temas populares galegos. Titúlase Mozart á galega e a proposta foi de Luís Soto, frautista da Filharmonía e un bo coñecido noso, xa que tivemos a sorte de que nos visitara no cole cando adicamos o proxecto documental á música. Despois volveu nalgunha ocasión e, quen sabe, ao mellor tamén nos visita para facer unha actividade final do club...

Premede sobre a imaxe para coñecer o disco Mozart á galega.

 

Tamén vos fixemos un díptico sobre Mozart, para que poidades coñecer moito máis este gran compositor, e se queredes velo a través da Internet só tedes que premer aquí.

A verdade é que desfrutamos moito desta obra, coa que remata tamén a actividade do club deste curso. Espero que nos vexamos na vindeira convocatoria todas as persoas que seguides no cole, e ás que marchades para o instituto, non deixedes nunca de ler!!! 

Unha aperta,

Rosiña

PRIMEIRA REUNIÓN DA CIDADE DO SAL

Ola!!!

Pois xa sabemos cal é a Cidade do Sal!!! E xa coñecemos un pouquiño a historia do xenio Wolfgang Amadeus Mozart, xa que el é o protagonista desta novela de Fina Casalderrey.

Sen embargo, na reunión de hoxe falamos moito da súa irmá, Nannerl, xa que hai un momento no que exclama: "Pronto terei que lle dicir adeus á miña música!" E é que as nenas e as mulleres non o tiveron nada fácil ao longo da historia. No club de lectura somos conscientes disto, e por iso hoxe conversamos sobre moitos aspectos nos que se observa que o xénero feminino aínda non acadou a igualdade. 

Hai unha película sobre a vida da irmá de Mozart.

 

E mentras falabamos, de fondo escoitabamos a música de Mozart, xa que puxemos o CD que tamén vén no libro: Mozart á galega, do que o próximo día falaremos un pouquiño máis...

Unha aperta,

Rosiña

O XENIO DA CIDADE DO SAL

Bos días!!!

A última novela de Fina C.

Hoxe anúnciovos cal será o próximo libro que leremos no club de lectura: O xenio da Cidade do Sal, de
Fina Casalderrey.

Neste caso trátase dunha novidade editorial, xa que hai pouquiño tempo que foi publicada, pero foi elixida a raíz dunha anécdota que sucedeu nunha clase na que unha alumna de 6º, Mai, buscando información sobre as estrelas, descubriu que hai unha teoría que di que Santiago de Compostela significa campo de estrelas. Falando do significado doutras cidades, apareceu a Cidade do Sal, pero en 5º e 6º non sabiades cal era esa cidade, así que por que non descubrilo a través desta novela que, ademais, ten un sorpresa auditiva moi interesante?

Imos alá entón con esta nova lectura, e para falar da primeira parte da mesma, reunirémonos na biblioteca o próximo 6 de abril. Non faltedes!!!

Apertas,

Rosiña

SEGUNDA REUNIÓN DESDE UNHA ESTRELA DISTANTE

OLA!!!

Xa rematamos a primeira novela deste curso, e a verdade é que esta mañá, na reunión, comprobamos que fora unha selección moi axeitada. Gustounos moito, recomendámola sen ningunha dúbida, e ademais aprendemos un montón de cousas a través da súa lectura.

Na reunión de hoxe centrámonos en Cuba, o país ao que emigrara o avó da protagonista. Falamos dunha árbore propia de Centroamérica e América do Sur: o mamey. Descubrimos que pode chegar a medir 20 metros, que o seu froito é comestible, e tamén se emprega para preparar doces ou refrescos. A súa madeira é moi dura, e emprégase para postes, construción, carpintaría... Desta madeira estaba feito o baúl que atopa Daniela no desván da casa da súa avoa. A folla desta árbore é moi parecida á do magnolio, e tamén a súa flor, aínda que é moito máis pequena. 

A folla e a flor do mamey recordan ás do magnolio.

 

O froito do mamey é moi diferente por fóra e por dentro.

Tamén falamos dos símbolos dalgunhas cidades, países, etc. A tía da protagonista casara un home de Dinamarca, e na súa capital atópase a estatua da sereíña que todas coñeciamos, así como o conto de Hans Christian Andersen. Pero tamén descubrimos cousas moi interesantes que nons sabiamos: que a realizou Edvard Eriksen, que está feita de bronce, mide 1,25 metros e pesa 175 quilos!!! Inaugurouse en 1913 e no Parque Europa de Torrejón de Ardoz, en Madrid, hai unha réplica dela.

A estatua da sereíña inspirou a moitos artistas.

 

Para rematar falamos das algas que se mencionan na novela e propuxemos escribir no noso caderno do club en que nos gustaría transformarnos se tiveramos o poder, coma Edu, para facelo. Pero isto decidimos que o mantiñamos en segredo, así que non podemos compartilo...

Apertas,

Rosiña

PRIMEIRA REUNIÓN DESDE UNHA ESTRELA DISTANTE

Bos días!!!

Hoxe tivemos a primeira reunión do club de lectura, na que falamos sobre unha boa parte da novela de Agustín Fernández Paz Desde unha estrela distante. 

Comentamos o que nos ía parecendo a historia, que nos ten moi enganchadas. 

Falamos de Daniela, a protagonista, e do lugar no que vive: Mondoñedo. Esta localidade da provincia de Lugo destaca moito pola súa catedral e por ser o lugar de nacemento dun dos escritores galegos máis valorados: Álvaro Cunqueiro.

 

A catedral de Mondoñedo e a estatua de Álvaro Cunqueiro.

 

Tamén falamos dos mapas das cidades, centrándonos nos de Lugo e Vigo, xa que son as mencionadas no libro que estamos lendo. 

O plano da cidade de Lugo recoñécese pola súa muralla.

Vigo, a cidade á que vai vivir Daniela, ten mar.

E, como o avó do protagonista emigrara a Cuba, tamén comentamos o tema da emigración, tan presente ao longo da historia.

A próxima cita será o 23 de marzo, cando comentaremos o resto da novela.

Desfrutade da lectura,

Rosiña 

RETOMAMOS O CLUB DE LECTURA

OLA!!!

Estou moi contenta de anunciarvos que este curso retomamos a actividade do Club de lectura Os xurelos lectores!!! Desde que se creou o club, no ano 2011, foron moitos os cursos nos que estivo activo, aínda que de maneiras moi diferentes, dependendo dos grupos que nel participaban. Cando chegou a pandemia decidimos suspendelo e, o curso pasado retomámolo pero dentro das aulas, polo que tampouco lle demos moita visibilidade a través deste blog. Pero este curso anúnciovos que si: o club está preparado para comezar...

O primeiro libro deste curso.

E faino cunha obra dun escritor moi querido por todas nós, persoas moi lectoras ás que lles encanta frecuentar a biblioteca: AGUSTÍN FERNÁNDEZ PAZ. A obra elixida é Desde unha estrela distante, xa que tamén está relacionada co proxecto que estamos levando a cabo este curso sobre o universo, xa que un dos seus protagonistas é Edu, un extraterrestre!

 

Hoxe fixemos o reparto dos libros para comezar a mergullarnos nesta nova lectura, que iremos contando en próximas entradas neste blog. Vémonos o próximo 9 de marzo!!!

Apertas, 

Rosiña

QUE É UN BAOBAB?

Chamounos moito a atención a aparición desta árbore dentro da historia de "O Principiño", así que quixemos saber máis:

O baobab, chamado tamén árbore botella ou pan de mono, medra, sobre todo, no continente africano, especialmente na illa de Madagascar.

A súa altura varía entre os 5 aos 30 metros. O seu froito é unha baga con forma de melón e abundantes sementes con forma de ril, que viven máis de 5 anos.

A forma de botella adóptana a partir dos 200 anos.

Os baobabs poden vivir ata 800 ou 1000 anos, aínda que se fala de exemplares que chegaron aos 4000!!!

Para os elefantes o seu froito é un manxar, pero tamén para os humanos ten moitas utilidades: sopa coas súas follas; bebidas refrescantes coa súa pulpa; aceite; usos medicinais; etc.

Según di unha lenda, os baobabs eran unhas árbores tan presumidas que un deus deulles a volta. Por iso se di que agora as ramas da árbore están enterradas e as raíces medran hacia arriba.

DESCUBRIMOS MOEDAS ANTIGAS

Na época na que foi escrita "O Principiño", en Francia non existía a moeda que agora adoitamos empregar en moitos países europeos: o euro. Tampouco no noso. En España utilizábase, ata o ano 2002, a peseta; en Francia, o franco. Partindo destes datos, quixemos coñecer cales eran as moedas de países que, por diversas razóns, nos interesaban. Así, comprobamos que en Portugal empregaban o escudo; en Italia a lira; en Grecia a dracma e en Alemania o marco. 

Situamos eses países dentro do continente europeo e tamén fixemos un repaso das súas capitais:

FRANCIA, O BERCE DO PRINCIPIÑO

“O principiño” foi escrita por Antoine de Saint-Exupéry mentres se hospedaba nun hotel de Nova York. Publicada en 1943, é a novela máis famosa deste aviador francés. É un conto filosófico, moi poético que, baixo a aparencia dun conto infantil, aborda temas tan profundos como a vida e o amor, a morte, a amizade, as actitudes e as preocupacións da vida.

Nas conversacións entre o narrador e o Principiño, o autor revela a súa propia visión sobre a estupidez da humanidade e a sinxela sabedoría que os adultos semellan esquecer cando medran.

A obra está igualmente ilustrada polo propio autor. Os seus debuxos, sinxelos e dun estilo se cadra algo infantil, son tan célebres como o libro mesmo.

“O principiño” foi traducido a 180 linguas e dialectos, incluíndo o galego, tradución da que se encargou Carlos Casares no ano 1972. Vendeu máis de 50 millóns de copias en todo o mundo e tornouse nunha serie de debuxos animados de 39 episodios, ademais dalgunhas longametraxes. Moitas veces é empregado como lectura para os que comezan a estudar unha lingua estranxeira.

COMEZAMOS CON: "O PRINCIPIÑO"!!!

Pois si. Esta foi a obra elixida para inaugurar o Club de Lectura este curso, "O Principiño". O día que anunciamos a súa elección, descubrimos tamén algúns datos relacionados co seu ecritor:

ANTOINE DE SAINT-EXUPÉRY naceu en Lión (Francia) o 29 de xuño de 1900 e finou no mar Mediterráneo o 31 de xullo de 1944. Foi un escritor, ilustrador e aviador francés, autor do Principiño. Nado no seo dunha familia nobre, estudou na Universidade de Friburgo (Alemania). Como aviador participou en grandes conflitos bélicos como a Guerra Civil española ou a Segunda Guerra Mundial.

Foi un dos pioneiros dos voos postais internacionais, un aviador nos días nos que a aviación posuía poucos instrumentos, e voar era unha tarefa extremadamente difícil e perigosa.

Os traballos literarios de Saint-Exupéry foron inspirados en moitas ocasións pola súa experiencia como piloto nos seus voos postais. Unha excepción é “Le Petit Prince” (“O Principiño”), o seu libro máis famoso. Neste relato, o propio autor coñece ao principiño, un neno que provén dun pequeno asteroide. En honor ao seu recoñecemento mundial, no ano 1975 outorgóuselle o nome de Saint-Exupéry a un asteroide.

En 1931, Saint-Exupéry casou con Consuelo Suncin Sandoval de Gómez (falecida en 1979), unha escritora e artista salvadoreña que foi modelo para a "rosa temperamental" no Principiño.